तुझं जगणं म्हणजे,
वाट फुटेल तिथं धावत सुटणं...
माझं जगणं म्हणजे,
सतत कशाचीतरी वाट बघणं...
तुझं जगणं म्हणजे,
स्वतःच स्वतःची पाऊल वाट आखणं...
माझं जगणं म्हणजे,
कुणीतरी आखलेल्या रेषेवर स्वतःला रेटणं..
तुझं जगणं म्हणजे,
हवं तेव्हा थांबणं, हवं तेव्हा पळणं...
माझं जगणं म्हणजे,
घड्याळातल्या काट्यांची वेळ पाळणं...
तुझं जगणं म्हणजे,
भारावून जाणं, हरखून जाणं...
माझं जगणं म्हणजे,
जखडून जाणं, गुरफटून जाणं...
तुझं जगणं म्हणजे,
लहानातला लहान क्षण देखील अनुभवणं...
माझं जगणं म्हणजे,
कवडी कवडी चा हिशोब ठेवत तिजोरी भरणं...
तुझं जगणं म्हणजे,
कुठल्याही तालावर थिरकणं...
माझं जगणं म्हणजे,
हमखास कंबर लचकणं...
तुझं जगणं म्हणजे,
मरतानाही चेहऱ्यावर समाधान असणं...
माझं जगणं म्हणजे,
जगण्याला कायमचं एक सुतक लागणं...
तुझं जगणं, ते खरं जगणं...
माझं जगणं, हे तर रोजच मरणं...
~ अरुण भऊड
No comments:
Post a Comment